ခြောက်ဆယ်နားနီးပြီဆိုတော့
ကျွန်တော် ........
ဒီလိုစဉ်းစားမိပါတယ်။
အခုချိန်မှာ
ငါဟာ .......
တင့်တင့်ထွန်းနဲ့တွဲကဖို့
မသင့်တော်တော့ဘူး ၊
သွေးတက်စာတွေစားဖို့
မသင့်တော်တော့ဘူးလို့ ။
အခုအချိန်မှာ
ငါဟာ .........
ဒေးဗစ်ဘက်ခမ်းလို နားပေါက်ဖောက်ဖို့
မသင့်တော်တော့ဘူး ၊
နဂါးဂေါင်းလှည့်တဲ့အရပ်ကို
ခရီးထွက်ဖို့
မသင့်တော်တော့ဘူး၊
ငတေမာရင်ပြီးရောတွေနဲ့
ဆက်ရန်ဖြစ်နေဖို့
မသင့်တော်တော့ဘူးလို့ ။
ခြောက်ဆယ်နားဆိုတာ
ငါးကြော်လည်း ကြောင်ချီ
ထီးတင်ပွဲလည်း မမီဆိုတော့
ဆားချက်နေတာပဲ ကောင်းမလားလို့
ကျွန်တော်စဉ်းစားမိပါတယ်။
ဒါပေမဲ့ .... အသက်ခြောက်ဆယ်မှာ
ဟေရာကလိုက်တပ်ဟာ မိန်းမယူခဲ့ပြီး
တဂိုးက ပန်းချီ စတင်ဆွဲခဲ့တယ်တဲ့။
အင်းလေ ..................
သူတို့ က ကျုပ်မှ မဟုတ်ဘဲကိုး ........ ။
သစ္စာနီ
(ရတီမဂ္ဂဇင်း၊၂၀၀၄)
No comments:
Post a Comment