** တစ်ဆောင်းသစ်ပြန်ပြီ . . . **

(၁)

လွန်ခဲ့တဲ့ ဆယ်နှစ်လောက်ကပေါ့
သူ သောက်နေကျ လက်ဖက်ရည်ဆိုင်လေးရဲ့
သူထိုင်နေကျ စားပွဲဟောင်းလေး တစ်ခုမှာ
မုဒိတာ ပြန့်ပွား ဝင်းပခဲ့ဖူးတယ် ။

တစ်ဦးချင်းစီရဲ့ ဒုက္ခတွေကို
ရင်းနှီးမြှုပ်နှံ ထည့်ဝင်လာကြတယ် ။
ပီတိ အမြတ်အစွန်းကို ခွဲဝေယူခဲ့ကြတယ် ။
မတူတာကို မယူဆောင်ဘဲ
တူရာ တူရာကို ပူလောင်မဲ့စွာဖြင့်
သမူဟဝါဒကို ထူထောင်ခဲ့ကြတယ် ။
ဟို လွန်ခဲ့တဲ့ ဆယ်နှစ်လောက်ကပေါ့ . . . ။

(၂)
ခနော်ခနဲ့ ထိုင်ခုံလေးတွေပေါ်မှာ
ပျော်စရာ တစ်မျိုးမျိုးနဲ့ အတူ
“ လက်ဖက်ရည်ချိုး ” ဆိုပြီး ဂုဏ်တက်ခဲ့သူတစ်စုဟာ
အခုတော့ . . .
လက်ဖက်ရည်ဖိုး စုံမက်သူများအဖြစ်
ဆယ်စုနှစ် တစ်ခုအတွင်းမှာပဲ
အဆင်းရော အချင်းပါ ပြောင်းလဲသွားကြတယ် ။

(၃)
တချို့ဆို  . . .
ကိုယ့်ကိုယ်ကိုယ် ကြိုက်ဈေးခင်းပြီး ရောင်းခဲ့တာကို
“ ဂလိုဘယ် လိုက်ဇေးရှင်း ”  ရဲ့ တောင်းဆိုမှုပါဆိုပြီး
ကမ္ဘာကြီးကို ယိုးမယ်ဖွဲ့နေကြတယ် ။

(၄)
တချို့ကတော့ . . .
တစ်ကွေ့ တစ်ကွေ့မှာ ထားရစ်ခဲ့ကြတယ်တဲ့ ။
ဘယ်သူက . . .
ဘယ်သူ့ကို ထားရစ်ခဲ့တာလဲ ဆိုတာ
ထိုဆယ်နှစ်တာ ကာလကို
အာဃာတမဲ့စွာ ငဲ့စောင်း စိစစ်ရင်း
တစ်ဆောင်း သစ်ပြန်ပြီ ရှင်မရေ . . . ။

မောင်ခိုင်မာ
(၁-၂-၂ဝဝ၂ ၊မိမိရဲ့၅၉ နှစ်မြောက်သို့  . . . )